台灣郎 (已結業)

係紅磡做完野，又係時候行落黃埔食野，本身我地諗住食讚好既，但我地行左去另一邊，發現十字路口果度開左間新台灣菜，好多人排隊，個menu都幾吸引，所以就等位入去試。等左一陣終於有個bar枱位，依間台式餐廳可以叫小菜，同人一齊share，其他鋪比較小見，menu都有唔同既台式小炒，可以叫飯黎送，另外都有飯同麵餐，我地叫左一碗牛肉麵($88)同一碗肉燥飯($35)，另外叫左杯苿莉奶茶($20)。等左一陣，野食都到喇，份量出乎意料地多。肉燥飯：肉燥有好濃豬油味，超香口，好有台灣味道，滷蛋好入味，超好食！牛肉麵：牛肉入味之餘，根同肉既分佈平均，幾淋，可以再淋啲。湯底充滿牛味，麵底爽滑，同個湯好夾，而且大碗！奶茶：濃既茶味，即使無叫少甜都唔太甜，岩晒鍾意飲茶既人。雖然依間餐廳既價錢同讚好比，係比較貴，但個人認為依個餐廳牛肉麵同飯都好過隔離街間讚好！！不過依間鋪頭樓面比較少，安排座位都比較亂，可能一時間太多人等位，唔夠人安排座位。不過佢地都好有禮貌，有求必應，希望之後多啲staff會無咁亂。