午巿套餐唔算多選擇，但每款都好吸引，熱食、凍食都有。兩個人分別點咗兩份套餐及兩份小食。食客數量唔多，好快送餐。
先上沙律及關東煮大根，沙律嘅醬汁獨特，唔係一般千島醬/ 柚子醋，酸甜得嚟有些微蕃茄味，開胃~ 菜亦好新鮮。關東煮大根入晒色腍軟身，味道唔濃烈或者好咸，可能中和味蕾方便好好品嘗主食。
朋友嘅軟骨漢堡扒伴金文拔芝士&洋蔥果醬配白飯接住上枱，扒身色水夠，半隻手掌大小但厚身，望到塊芝士口水流流，仲有沙律菜伴碟。汁醬味有點似薑汁燒，洋蔥蓉入口即溶，扒身無一切散開，十分結實，入口又帶點彈牙，配合半溶芝士及汁醬，肉汁喺口腔慢慢滲出嚟，絕對PERFECT! 白飯軟腍度適中唔笠口，呢個主食推薦！
期待嘅明太子蓉火炙左口魚裙邊丼嚟啦，左口魚裙邊嘅油身、明太子醬嘅橙色配合埋魚籽嘅精瑩通透，成個飯都好吸引，份量亦都啱啱好！左口魚裙邊入口嘅油溢韻味喺口腔迴蕩，唔想吞落肚，明太子醬嘅暖滑口感亦都配合得十分好，爬飯入口停唔到，要點要點！
至於小食蟹肉味噌，絕都係驚喜！磨幼身嘅蟹膏變得滑身，加埋本身香味，細口品嘗獨有鮮味，送飯又得。特製鱈魚乾濃魚乾味，脆身似薯片、墨西哥片口感，沾上蟹肉味噌，又係另一種食法。提供埋青瓜沾食，開胃佐酒之選！對蟹類、內臟系無敏感嘅朋友絕對要試，大讚大讚！！
另一客小食雞骨腸 (一客2份)係不過不失之選，咬落去皮脆，聽到腸衣裂開聲音，內裡雞肉身嫩滑暖暖口感，份量上亦都係唔係一支骨"掗"晒條腸，真係啖啖入口到尾末先咬到骨頭架，可試可試！
總體而言，呢一個價錢係銅鑼灣黃金地段食午餐、一分錢一分貨得嚟超出小小預期！
