2DP (已結業)

今日帶個仔去尖沙咀太空館參觀，中午順路先嚟尖沙咀厚福街的2DP 食個輕便午餐，因為我上網見到佢個漢堡包超級大個 ！嚟到2DP先知原來呢度係食素嘅，就連漢堡包入面嗰塊扒都係素肉嚟嘅。不過唔緊要，試下啲咁新朝嘅素食都唔錯。2DP自家素牛漢堡，好巨型，有7層厚，中間夾左新鮮蔬菜番茄同薄脆，香煎過嘅素牛肉厚得嚟都好juicy， 加埋個蘑菇汁，呢個漢堡其實同真嘅牛肉漢堡差唔多！另外點左個，無花果海葡萄南瓜籽沙律， 無花果好鮮甜，沙律菜好新鮮，海葡萄好爽口！呢款沙律好少地方見到。呢度其實仲有中國茶飲，我見啲茶具都幾特別幾靚，下次有多啲時間嘅時候黎呢度沏茶輕鬆慢活下都唔錯。