Igatti (已結業)

一向喜歡食拿破崙嘅我，係網上見到唔少人推介呢間位於屯門市廣場嘅小店。早幾日經過見到d 拿破崙非常吸引，就打算買黎試下啦。拿破崙買左後最好都係即日食，雪過夜真係差好遠架。呢度嘅拿破崙係用新鮮水果同埋日本材料整食，可以揀小件或者一整個，我地人少，所以只揀左兩小件，今次我地試左芒果同士多啤梨。拿破崙法文叫Mille Feuille，有千層酥嘅意思，餅如其名，三層酥皮要夠薄，焗到金黃色，食落相當酥脆，入口一咬即碎，牛油味洽到好處，唔會太濃，三層酥皮之間有一層香滑吉士夾左水果，另一層係海綿蛋榚，只係賣相已經非常吸引啦。士多啤梨拿破崙：拿破崙上有大大粒優質士多啤梨，旁邊加左兩點甜而不膩嘅忌廉，酸酸甜甜嘅士多埤梨配上自家製吉士醬，入口非常香滑，整體唔會過膩。芒果拿破崙：呢個組合永遠係我嘅最愛。芒果非常新鮮，聞落非常香，味道酸酸甜甜，同吉士醬簡直係完美組合。