塚田農場 (已結業)

今日經過APM買野，見到呢間主打日式料理同精緻火鍋既塚田農場，餐牌都幾吸引，仲有自助飲品吧同沙律吧，肚又餓餓地，一於就食個靚lunch 。同唔少餐廳一樣，都係採用自助落單 ，scan QR code揀食物，叫完就睇到帳單價錢，都幾方便。我就叫左個美人鍋套餐，選擇和牛肩脊肉，同骨膠原湯底。好快就送上蔬菜拼盤，望落色彩繽紛，非常新鮮，而且啲菜好甜，尤其係蘿蔔片同粟米荀，夠曬爽脆。明太子芝士免治雞肉好特別，將免治雞肉整成滑咁，加埋明太子同芝士好好味，食落好清爽。和牛肩肉好多雪花，入口牛味好香，肉質好嫩，不過份量唔算好多，只有4片，如果多少少就更好了！食到咁上下有啲唔夠喉，就加多個豚肉雞肉同辣味免治雞肉。雞肉熟左先上檯，一開頭以為會老，但食落非常嫩滑，好有驚喜。跟餐仲有個麵，加埋醬汁吧有好多醬揀，可以調配個人口味，加埋麵一齊食好惹味。食飽飽可以飲埋啲美人茶，平時飲杯水果茶都成三十蚊，呢到有得任飲，正！果茶甜度適中，好香果味，同火鍋一齊都好夾！