日喜樓 (已結業)

好耐冇同班朋友食飯，有朋友話想試下登龍街呢一間新開嘅精緻中菜，之前已經喺網上面見到有唔少好評，一於嗌齊飯腳一齊試下。餐牌係用tablet 去睇， 睇落個餐牌都幾豐富。首先叫左個冷盤燻蛋試下， 每人半隻， 上面仲有唔少嘅黑松露，賣相非常精緻。咬落去流心嘅蛋黃，夾雜著煙燻既味道，非常香。芙蓉三鮮， 淨係聽個名都非常之靚，其實就用咗蛋白同埋鮑片、帶子、蝦仁煮成，食落好鮮味好滑，拎嚟送飯一流。而呢一個四喜臨門小籠包 ，分別有四種唔同嘅味道，外皮用上蔬菜汁調色。拎起嚟嘅時候真係要小心，因為個外皮好薄，好容易一不留神就整穿。 食落啖啖都係湯汁，非常好食。而今日嘅重頭戲，水煮原條桂魚， 最令我欣賞嘅係啲魚肉起曬骨，啖啖都係肉，而且辣味好香， 花椒嘅麻香同辣椒嘅辣味剛好， 辣得嚟好過癮。側邊嘅配菜例如薯粉芽菜吸收曬辣汁，鍾意食辣嘅人絕對會食到欲罷不能。而家一個湯浸茶樹菇翡翠苗亦都唔錯， 上湯嘅味道好香濃，蔬菜吸收曬上湯味道，食落好鮮味。最後當然要叫個甜品，呢個吾是南瓜賣相好精緻可愛，外皮軟滑，入面竟然係紫薯餡，食落好驚喜，而且味道唔會太甜， 同女仔朋友食飯必叫呢個。