月禾居串燒手打鳥冬 (已結業)

紫心香芋丸外脆內軟，食落唔會太黏同唔會黏牙，texture做得OK。香芋甜甜地幾好食，唔會太過甜，但係整體都仲係有少少膩。即使我地只點兩隻生蠔，但碟上都放在好多冰黎keep住d蠔既鮮度。生蠔新鮮而且幾甜，一d腥味都冇，完全唔需要點醬同落檸檬汁，幾好食。牛油燒帶子用一個小鐵鍋盛載，上菜時特別香，好香牛油味。帶子好大隻，啖啖肉，一開頭食既時候非常鮮嫩，但經鐵鍋既餘溫不斷煮熱，再食就變得有少少老。但總體味道幾甜幾香，唔錯。招牌蒜燒茄子將原條茄子切開一半，然後灑上滿滿既蒜蓉燒製，味道好香口同惹味，我認為係其中一道必點既菜式。唯一無法解決既問題就係茄子非常吸油，幾油膩。仲點左燒汁鰻魚半條，鰻魚啖啖肉仲幾嫩滑，加上蒲燒鰻魚汁變得好RICH，雖然好食，但比較適合配飯食。雜菜豆腐鍋偏重清淡既感覺，食完煎煮油炸可以中和一下。而什錦鍋仔烏冬完全冇咩特之處，就系簡單一個烏冬，no comment。