臺北棧 (荷李活道) (已結業)

有時發現原來食得太好，都想食番啲簡單普通嘅菜式。朋友帶我嚟上環呢間台式酒吧餐廳小店，雖然面積唔大，但係中環地價貴大家都理解，食物絕對唔差，環境裝修都超級有氣氛，霓虹燈嘅裝飾令到成個場都熱鬧起來，味道唔可以話100％台灣， 當中加插左香港人喜歡嘅元素，例如蛋餅配咗香芋蓉，冇諗過呢一樣鹹食都可以變成甜，當中仲加入咗忌廉，甜得呢又香又滑，意想不到。台灣a菜就係我哋嘅油麥菜，普通油麥菜食落會苦，但係佢嘅醬油汁令到個菜變得鮮甜，面頭半肥瘦嘅 肉粒，油脂滲落去菜入面，仲更加香滑。欣賞佢嘅台灣牛肉麵湯底，香濃而不鹹，望落去顏色仲好清澈，牛肉煮得淋，而且充滿牛嘅濃香，絕對冇啤水牛肉嘅味道。最鍾意佢隻溏心蛋， 蛋黃煮得啱啱好，小店設有酒吧枱，睇嚟酒精飲品呢個環節係唔可以睇少，叫咗一杯周董，佢係茶加蜜糖加酒精，呢個配搭第一次試，清新得嚟又有點刺激，唔錯。