ICONIC H 特色熱狗店 (已搬遷) 新店位置

因為工作關係，又要黎到黃埔做野，今次第2次試ICONIC H，試左第2款熱狗。呢間快餐店環境唔錯，可惜只係得返5個座位，無位既話只可以外賣。一個熱狗都係$25-$28，如果想配套餐，就要加12蚊，包飲品同配菜。配菜可以揀薯條/薯笑餅/粟米杯/小沙律杯其中一款。熱狗上可以另加＄10配配料，有肉醬，熱熔芝士，黑松露蛋，煙肉碎或者德國酸菜。今次我試既係蘑菇法蘭克福腸熱狗， 麵包幾軟熟下，蘑菇法蘭克福腸味道好普通，有點兒傳統，雖然條腸係蘑菇腸，但係都食唔到有蘑菇既味道，賣相方面，條腸呈鮮紅色，希望唔係太多人造色素。醬汁方面我揀左辣汁，食落都幾辣下。配菜方面原本想要薯笑餅，但係剛好無貨，只可以要粟米杯，呢個粟米杯牛油味淡，幾合我口味。