台北東南台式火鍋 (渣打銀行大廈) (已結業)

啱啱開張嗰陣時去食、同今日年初三人流都係差唔多 ⋯ 咁當然食返一樣嘅午餐$88、但係上次碗麵勁淡口所以今次揀咗7號脆皮雞扒飯。首先攞出邊嘅嘢食、12點嘅時候係多嘢既 ⋯ BUT 以前有嘅花枝丸、甜不辣、炸番薯同埋滷水雞翼全部失蹤！而家變咗炸春卷、咖喱角、薯角、炒菜、炒飯、魚肉燒賣同埋一個唔好食嘅韭菜餃。好明顯台式不再 ⋯ 不過新年有素鮑片、蛋餅變咗得返塊皮又乾又凍，連茶葉蛋都冇左。攞咗醬料等陣送飯、出面啲小食基本上微暖而且多數唔好食 ⋯ 出面個滷肉飯得返好少滷肉全部都係油，拎咗一碗算係最熱。脆皮雞扒飯到啦、五舊雞扒一啲台灣風味都冇 ⋯ 旁邊嘅滷肉飯同出面一模一樣，雞扒冇味係出面啲粉比較脆、呢度嘅主菜真係唔得！到咗甜品環節 ⋯ 之前食過一個好似椰汁西米露我記得好好食、仲可以自己加紅豆同埋仙草。今日變咗番薯糖水即刻跌 watt、仲要又係微溫 ⋯ 加埋紅豆同埋仙草變咗凍食，我見到有幾隻雪條同埋椰子雪糕、但係個雪糕勁難筆硬到飛起。呢間嘢繼續好坐員工態度好 BUT 嘢食跌曬 watt 雖然價錢一樣 ⋯ 但係越做越差、出面啲小食你睇得出佢 Hea 到不得了！靚靚裝修有啲浪費！