綠茵閣 (已結業)

今年第三年嘅信和之友生日自助餐，原本想去尖沙咀，可惜主題係川菜唔啱我，不過北角亦係唔錯嘅選擇。食物種類比上年多同好味，客人亦比上年多，差唔多全場滿，座位唔會逼，依然闊落，職員收碟都快。麵包蟹無鮮味，無咩膏，肉有啲鬆散。翡翠螺有沙，其他質素唔錯。煙三文魚煙燻味香，食多幾件都唔覺漏。細細碟嘅前菜清新又好味，可清洗吓味蕾。刺身有五款，質素普通，相比之下壽司出色，款式多，新鮮，賣相唔錯，最重要好味。燒牛肉唔錯，唔會韌，羊架有層油脂，入口唔騷，牛尾亦炆得夠淋夠入味。其中炸魚好滑好香口，不過第二件就開始覺得醃得太勁，喉嚨好乾。全晚特式食物有三款，蒸海鮮塔，海鮮粥，同燒澳洲牛三款。燒物一般，鵝肝亦燒得太乾身，入口冇咗油香感。炆鴨好味，一啲都唔韌又唔會鞋。泡芙好味，不過好硬要解凍。甜品種類好多，賣相精美，有我最鐘意嘅芒果拿破崙，好好味，不過好快冇晒Lu。好多甜品會墊一張卡紙，方便客人又衛生。呢度嘅甜品感覺比較少甜，唔會太漏，馬卡龍亦唔太甜，唔痴牙。其中一款木糠布甸用紫薯忌廉，好清新。再食埋回本嘅Movenpick雪糕，完美的一餐完結。