要數沙田環境靚又坐得舒服嘅蛇羹店，一定係四季芬芳。
舖頭新開，睇得出裝修十分用心，牆壁、天花、地板、餐具全部都係精心設計佈置，
大膽用色，仲有好搶眼嘅霓虹燈，
將新舊元素融合，呈現十分繽紛有活力的中國風～
專門嚟四季芬芳梗係要食蛇啦！
招牌菜必數蛇羹🐍同蛇碌
花膠太史蛇羹 $98
蛇羹賣相精緻，湯羹口感濃稠滑溜，蛇羹配料豐富，份量夠兩個人share。蛇肉唔會腥，未試過蛇嘅朋友可以嘗試下蛇羹，好容易接受。
另外食蛇羹必不可少嘅配料精緻咁用小碟裝起，有脆片、香蔥同檸檬草～ 建議試完原味後，可以加d檸檬草，口感好清新，味道層次更豐富。
蛇碌炆雞煲 $248
食蛇必點蛇碌，啖啖蛇肉先滿足～
呢個蛇碌雞煲份量都幾足，有成6、7舊蛇碌，雞肉都唔少，用超厚砂鍋上台，新鮮滾熱辣。一上台香氣撲鼻，d汁仲翻騰緊～記得撈一撈煲底d雞，以免燶底，個煲真係好熱。
最正係食到最後煲內嘅食物都仲係溫熱！
蛇肉都係完全唔會腥，好容易接受，醬汁十分惹味，雞肉嫩滑，食到停唔到口。
豉油排骨白鱔煲仔飯 $108
秋風起，就係食煲仔飯嘅好時節～
呢個煲仔飯d 白鱔真係好出色啊！肉質柔軟嫩滑肥美，仲要完全冇泥腥味，正！排骨都好滑好彈牙，美中不足就係冇乜飯焦😢😢
覺得唔夠味可以落d豉油（綠色樽），佢地嘅甜豉油質感比較濃稠，唔建議落太多，幾滴就夠。
甜品 （一碗糖水加2件糕點） $52
食完咁溫暖味道偏濃嘅菜式，糖水揀左清熱解毒綠豆沙清清味蕾。綠豆沙好濃稠，個人超鍾意d綠豆煲到起曬沙，綿密豐厚，又唔會太甜，仲有d 海帶增加口感，好味～
糕點分別係桂花糕同紅棗糕，估佢唔到兩件都係凍糕，但口感出乎意料軟滑～ 桂花糕入口嘅質地同平時食到嘅差唔多，但係入口一陣好快變得軟滑，質感比平時嘅濃稠，香味更加濃郁，同平時食到嘅幾唔同。
1
紅棗糕雖然係凍食，但非常軟糯，食到棗泥嘅感覺，好足料。總括而言，雖然四季芬芳定價稍高，但食物味道都幾唔錯，環境設計同餐具都好有心思值得加分。蛇肉味道唔濃，特別適合未試過蛇肉嘅朋友嚟嘗試下～
