十六座車仔麵 (已結業)

好少食麵，因為我唔係幾鍾意食麵更莫講話車仔麵所以我真係第一次黎食依間十六座車仔麵～個名聽就聽得多啦，水準如何真係要食過先知！我哋兩個人食，一人叫咗一個懷舊麵餐因為睇餐牌，好大碗好多料咁而且送檸檬茶，正呀我哋見價錢合理，所以決定試吓呢個。我嗌嘅係配公仔麵～侍應姐姐一放上枱...嘩！果然係好大一碗囉，我心諗自己一定食唔晒，一試之下，食第一啖面已經覺得：「真係果然冇令我失望！」佢啲湯底都唔錯，我依啲好少食麵嘅人竟然會覺得都OK～而且佢啲蘿蔔一啲渣都冇，仲幾爽口吓～紅腸同埋魚蛋都好彈牙尤其是我好鍾意食紅腸，所以第一時間即刻食晒啲紅腸。最令我有驚喜嘅，係佢啲豬紅！唔知加咗啲咩落去，啲豬紅特別好食，唔會話太淡而無味，但係又唔會話咸到入唔到口，因為我食過有啲豬紅係又咸&口感又鞋十十咁，食到想嘔，但係佢啲豬紅唔會令我有依種感覺，好味到我竟然清晒所有豬紅！本身冇預過會食得晒碗麵嘅情況之下，最後竟然成碗食晒真係性價比十分之高連我呢啲好少食麵嘅人，都覺得又好食又抵食，而且服務都好好、好有禮貌