Townhouse (已結業)

環境唔使講，昏暗嘅燈光好有氣氛，而且D檯好闊，坐得幾舒服。雖然話食飯一部分係食個環境，都係食物先係重點。有好嘅食物，好環境就係錦上添花；冇好嘅食物，徒有好環境就係浪費。雞翼有啲乾，味道正正常常。嚇死人之作，我真係唔知risotto之難食度可以到達如此極致。chicken mushroom risotto, 明明個樣唔應該係咁架，大家google 下睇下就知我講乜！同樣材料，烹調方法一錯，真係連個樣都離行離迾。呢個樣，唔係X式雞扒飯咩（不過人地好味好多），唔好呃人喎。賣相騎呢都算，真係表裡如一，連味道口感都一樣嚇人。雞肉鹹到我條脷短暫麻痺左，嗰啲飯粒真係令我體會到咩叫「生硬」。 食呢碟嘢真係可以令人好禮讓，冇人爭。 其實我地當時好有衝動請個廚師食呢碟嘢。食到好無奈又唔飽，結果為穩陣起見，叫左個茄汁意粉，雖然平平無奇，但大家都為其平凡而感動，真係可悲。但點都好過食上面咁刺激嘅嘢。成餐最好味係呢個甜品，溶化嘅custard 有少少暖，個雞蛋仔夠香脆，終於慰藉到我地受傷嘅心靈。咁嘅食物質素，總體來講真係唔合格，咁都可以喺蘭桂坊貴價地段立到足，實在令人詫異。只可以話係對食客荷包同味蕾一大損害。