彩龍大酒樓

因嫲嫲住附近老人院
所以近近地試下呢間酒樓食嘢
點知好不愉快嘅經歷！
以後都唔會再嚟！


主因一名女侍應嘅態度
一入到去問我幾多位
我答6人，其中1位坐輪椅
跟住個女侍應答我：
無問我係咪輪椅，剩係問你幾多人
心諗洗唔洗咁串呀！


其次第一次見一間酒樓
枱枱都唔提供匙羹（見隔離枱有一隻）
因為想方便嫲嫲食嘢就問佢拎
個女侍應答：食粥同飯先會俾
我忍唔住同佢講：都係想拎俾老人家用啫
佢先走去拎兩隻


食嘢方面，我哋叫左個豉汁蒸排骨
上到枱啲肉出緊血水…
其他點心例如燒賣、叉燒撈粗啲肉都係唔新鮮
第一次食煎蝦腸食到有沙添
最食得過係個奶皇千層糕（可能係交貨好啲..)


啲筷子🥢一開始摸上手都好笠…
我知呢啲舊式酒樓都唔可以有啲咩要求
但最不憤係侍應態度問題


因為嫲嫲食嘢不便
難免會製造食物殘渣、紙巾、食嘢圍巾等垃圾
不過我哋都盡量將所有垃圾
整潔地扔入平口膠袋綁好帶走（完全無周圍扔）
點知最後臨走
仲要俾個女侍應話啲垃圾唔好扔喺度
問題係我哋都未走！就已經同人咁講！
我家人都好激氣
點解明明我哋咁清潔
都要咁樣俾人話？


食物唔好/一般都算
如果連職員態度都咁差
真係完全可以black list!