龍華酒店 (下禾輋)

營業中

休息中

經Openrice購買龍華酒店80週年極品紅燒乳鴿皇4人餐，價錢$338另加茶錢同加一服務費都好抵食！懷舊南瓜雞茸粟米羮，落咗好多南瓜同粟米超正！柚子蜜棧金沙骨，清甜柚子味仲好脆！兩隻乳鴿皮脆肉厚，肉汁滿溢！沙田滑雞粥，煲得好棉好滑，雞醃得好入味，啲鷄煲過粥都唔韌！椒鹽香脆海蝦只得四隻，香脆爽口！蠔油雜菌撈麵，睇落去好普通但意想不到好味！上湯紫准山自耕有機菜，菜心好新鮮，加咗黑木茸同杞子好健康，足夠纖維，但紫准山味道同口感好怪，咬落去好似漿糊😖！最後甜品係一桶山水手造豆腐花，唔算大桶，一人一碗，香滑好味，好想再食！總括嚟講呢餐真係抵食又好味，但只係上菜嘅時候，一次過上晒食物，好似有啲趕客嘅成份！小時候去龍華又食又玩，係呢到真係可以回憶童年！