迷你毛

營業中

休息中

深水埗依家已經變左cafe林立嘅天堂，有好多特色嘅cafe,今次介紹嘅《迷你毛》其實就係英文Minimal嘅諧音。門口已經有好多打卡位，我就坐左近窗邊嘅圓形大卡位，有一個落地大玻璃去觀賞街景。全日窩夫早餐 $130全日早餐有窩夫、炒蛋、煙三文魚、兩款唔同嘅香腸、炒野菌、煙肉、炸海膽可樂餅。窩夫新鮮焗製，食落外層好鬆脆，又充滿蛋香味。至於炒蛋就非常嫩滑。兩款香腸都充滿鹹香咬落又好多汁。另外佢哋有一個好特別嘅炸海膽可樂餅，上面仲放咗矜貴嘅黑魚籽,味道好濃郁。香煎虎蝦海鮮牛油果米型粉 $138大大隻虎蝦，食落彈牙又鮮甜。裡面仲有小魷魚同埋三文魚籽，海鮮份量都好豐富。米型粉用左牛油果醬又煮，所以呈綠色，食落好香滑又帶香甜。意大利芝士蛋糕 $77佢地最出名嘅甜品就係意大利芝士蛋糕，外型同出邊傳統嘅正方形好唔同。佢哋係一個半圓形，上面灑滿朱古力粉，遠睇真係好似朱古力菠蘿包。用左Mascarpone芝士，又加入左杏仁同埋咖啡利口酒，充滿酒香又有咖啡味。Rose latte $40淨係拉花都好靚，咖啡有果仁香味又唔會太苦，又有玫瑰花味。芒果乳酪 $48好清新嘅芒果味又有乳酸嘅口感同埋味道，都好特別。✨