龍城冰室

營業中

休息中

銅鑼灣一向都多餐廳，今日同朋友黎到龍城冰室食lunch。依個時候食飯都比較多人，不過好快就等到位。餐廳設計簡約，非常清新。我地叫咗是日午餐洋蔥豬扒飯($56)，配白湯同熱華田。餐湯可以揀白湯紅湯中湯，今日嘅白湯係素翅忌廉湯，滑得黎又唔膩，素翅都有唔少條。洋蔥豬扒飯非常大碟，而且豬扒有2塊，煎得好香，再加上濃濃嘅洋蔥汁，送飯一流。難得黎到冰室，又見到餐牌上嘅西多士豬扒包呀好似唔錯咁，於是叫咗個推介嘅芝士流心西多士($26)。西多士上面有一整塊牛油，非常邪惡，而糖漿就可以自己加，一切，佈層嘅芝士處於半熔化嘅狀態，軟綿綿，好滿足。下次黎一定要再試下紅豆西多士！最後仲叫咗韓汁炸雞($36)，金黃色，好脆口，粒粒都係肉多皮薄，仲配埋韓式辣醬，夠哂有風味。