佳芳廚房

營業中

休息中

我係深水埗街坊，住咗1年幾，成為咗我嘅飯堂。我認為佳芳廚房係全深水埗區最underrated 嘅平民餐廳，有禾桿冚珍珠嘅感覺，表面上同普通一間餐廳一樣，但食落就知好唔同，食材係新鮮嘅，唔用味精，係食得出嘅，因為食完唔會口苦鼻苦想飲水，的確係健康同平價之選。餐廳招牌菜式係皇帝粥（皮蛋瘦肉粥足料版本）+每日不同款嘅足料燉湯，但我個人更加喜歡食點心，食得出唔係預製，例如鳳爪亦有新鮮南瓜托底，balance 到啲汁嘅鹹味，仲有老闆家鄉菜式茂名撈粉，平時少見，用生蒜+熟蒜+橄欖油+豉油嘅配搭令我有一排食到上癮。門口同普通餐廳完全冇分別，令你以為佢只係yet another 嘅茶餐廳之類，價錢都會令你誤會食物水準，例如一客飯+湯+菜賣$68，如果呢個質素放喺銅鑼灣／旺角，我覺得比到$98都唔過份，係深水埗價格，做到非常好的性價比，最重要係食得健康。呢度係熟客為主，基本上我隔幾日就會來食，老闆娘亦儲緊熟客，雖然作為街坊都唔想自己個食堂出名，但老闆娘係今時今日呢個飲食業狀況仍然肯有心做飲食，我覺得係值得支持嘅。