祥利車仔麵 (西洋菜南街) (已結業)

之前有聽朋友介紹過，咁啱見到旺角新開，所以專程去試吓。不過佢嘅店面太簡約，行過咗龍都唔覺，然後倒返轉頭搵呢間舖頭。人流唔多，只有一兩枱客人，環境好清幽，完全唔似車仔麵，簡約文青風。車仔麵，我叫咗油麵。餸叫咗咖喱魷魚、蛋、日式叉燒。如果唔係送咗幾條生菜，成個包裝真係好似日本拉麵。日式叉燒幾好食，推薦，如果舊叉燒再大份啲就好，魷魚佢比好多，份量幾充足。蛋係流心的，真係好有食緊日本拉麵嘅feel。我叫小辣，已經都幾辣。咖央西多士，附有牛油同埋煉奶。中間的醬會比較多，唔知點解食落有少少奶皇包的味道，不過都算幾好食。凍檸茶加$8。椰汁紅豆冰加$12埋單HKD 104。