流記香港仔艇仔粉 (已搬遷) 新店位置

如果食物界都有非文化遺產，艇粉一定可佔一席位，以前繁盛的香港仔避風塘，現在只剩流叔一架艇守住呢個風味的艇粉！只怕一天他退休便會成為歷史陳跡呢！呢碗粉一直只靠口耳相傳，前年有次想試，特登喺香港仔海濱搜索，問咗途人先知原來隻艇會泊幾個不同位置，要食到佢真係可遇不可求，但有個電話可call流叔過嚟的！前年call佢打咗幾次先有人接聽，但不巧的是他說今日休息唔開工呢！心情插落谷底。直到今日先有機會再前往幫襯，海濱找不到他踪影，再打佢電話，好快接通，但佢喺另一邊賣緊，要過15-20分鐘先過倒嚟！咁梗係等佢啦！今次終於願望達成！見流叔一個人一腳踢，揸船、落單、斬料、淥麵、收銀、傳菜！果種不經意，感受到佢係做得開心的，我同佢終於對倒話，唔知有咩可叫，就同佢講要碗雜錦河粉啦！他說河、米、瀨都有，推介瀨粉！見佢三扒兩撥，一碗熱騰騰的艇粉送到岸邊，只收我$30一碗，我當然覺得抵啦！湯頭都係鮮甜的，接受得到，配料有鴨、雞、腎及魚旦等！已經比好多粉麵店整得好食，大滿足。流叔仲問我好唔好食，我話正呀！佢賣咗幾碗之後就揚長而去了。真係有啲神鵰大俠feel呀！😁😁😁😁😁😁😁😁真心希望下一次嚟仲可以食到呢個粉啦！電話