石一燒 (富多來新邨一期) (已結業)

去過幾間石燒店都冇乜好印象，舊石燒到熱一熱，一方面要趁佢凍之前燒熟d肉，另一方面係舊石極高溫，好多時唔覺意就燒到全熟好鞋口。 今晚見到塊石個心就定左一半，原來塊石全程都有火熱住，正常溫度，放多陣保溫都仲保持到嫩滑。開頭都擔心淨係叫極上和牛二人前set會唔飽，但就算冇得添飯，男仔都捧住個肚走。  和牛比一般日式燒肉切得厚，肉味同口感更加突出。 成個拼盤入面最鍾意和牛三角胸，一睇就知係最肥，係一般人接受到嘅油香。日式釀雞翼分別釀左糯米同芝士忌廉蘑菇，意外地糯米雞翼更加惹味，辣辣地完全唔會膩。 雞皮燒得超級好，煙韌又香口，雞翼尖都食埋。飽餐一頓，其實是但上個雀巢雪糕都收貨，估唔到有心地有埋綠茶粉自製綠茶雪糕，有得食有得玩，仲要茶同雪糕都有水準，同朋友一致話一定會再黎。