B.Duck & Buffy 德記茶樓 (已結業)

朋友想飲茶但又唔想去酒樓咁單調，所以話試下B.duck主題餐廳，順便打下卡。其實除咗點心之外，仲有車仔麵，都好抵食。不過今次我哋主要都係食點心，質素都唔錯。流沙奶皇包上面印咗B duck 個樣好得意，成個包都係黃色嘅，鹹蛋味濃郁，上菜時仲熱辣辣。皮薄餡靚，晶凝通透嘅蝦餃， 唔止食得仲睇得， 咁薄嘅皮都有B.Duck嘅圖案，食得好開心。炸雲吞香脆可口，咬落唔乾仲索索聲。仲有隻甜甜鹹鹹嘅醬點。金錢肚份量都好多，而且夠哂入味。 值得一讚嘅係，薦底嘅係芋頭，好林，仲索哂啲味，成碟清哂。本來以為卡通主題餐廳都係打卡好過食，但估唔到b.duck 啲點心睇得又食得。價錢唔算貴但係每件點心都有b.duck 主題，而且舖頭都有好多b.duck，大人小朋友都好啱一試。