喜來稀肉 (已結業)

喜來稀燒肉係香港開咗咁多年，我今日真係第一次嚟。以前已經聽聞佢係一間好正宗嘅韓式燒烤，今日嚟到亦都好有驚喜，因為原來佢啲員工全部都係韓國人。而且呢度嘅環境都幾舒服，地方都好大，可以容納到好多張枱，中間仲有一棵樹，上面夾滿晒員工佢哋好開心嘅相，去到牆身都仲有一大個用相砌成嘅心心，完全感覺到韓式浪漫。未開始食，職員已經擺定晒啲任食嘅前菜。有醃蘿蔔，酸蘿蔔，泡菜，大醬沙律，呢啲都係任食。佢個泡菜比較辣，唔似其他地方偏甜，口味比較正宗。然後最重要嘅係爐邊蛋，佢過爐邊間有分芝士同埋泡菜味，同樣都係任食㗎。芝士蛋就比較煙煙韌韌，食得多都比較膩。而我自己比較鍾意食泡菜蛋，佢呢隻泡菜唔辣嘅，酸酸地好開胃，加埋啲咁滑嘅蛋，真係好好味。開始燒肉之前，我仲帶咗個大醬湯，佢個湯入邊有蜆，蟹，牛肉同豆腐，但係個湯比較淡，有左咸咸辣辣嘅味道，建議自己加啲泡菜撈落去會好食啲。肉類我就嗌左個豬嘅護心肉，護心肉唔會肥，比較瘦，爽得嚟又唔會韌。另外當然要嗌佢個招牌，喜來稀肉啦。佢係薄切牛肉嚟，比較瘦，但係肉質比較腍，牛味唔算太濃。最後就係牛舌，佢個牛舌真係唔錯，唔似有啲一燒就好韌，佢呢個係爽嘅。