一芳台灣水果茶 (已結業)

台灣珍珠奶茶歷史悠久，响香港亦紮根多年。而近年又有好多嘅台灣飲品店進駐香港，令大家除咗珍珠奶茶外，可以認識更多台灣飲品。一芳係我最近比較喜歡嘅台或飲品店之一。一芳無論是店名，店舖嘅裝修，以至飲品餐牌都俾人有種清雅、簡約、細緻、慢活、有品味嘅感覺。佢嘅水果茶好出名，之前成日排長龍。見今日冇咩人，就一於買返杯去草地坐住嚟飲，享受一下周末嘅陽光，感受一下慢活嘅態度。金蜂洛神檸檬呢款飲品係固定甜度冇得加減，只可以調整冰量。洛神花，檸檬都係酸嘅，只用蜂蜜增加甜味，所以整體偏酸，非常化滯解油。飲完好醒神吓！大甲芋頭鮮奶中秋節前後，正值芋頭當季之時，而大甲芋頭响台灣出晒名，又粉又香。呢杯芋頭鮮奶有三分之一嘅芋頭蓉，配濃郁鮮奶香到不得了。我揀半糖，所以唔會好甜，反而品嚐到芋頭嘅香濃綿滑。再加埋粉圓（珍珠），好似食咗碗芋頭露咁，飲完都幾飽吓！但真係好回味。。。超推介大甲芋頭系列，而我下次會再試吓其他茶種，期待！！！