黃金車仔麵 (已結業)

入嚟寶琳睇戲，印象中新都城二期嗰邊快食個飯都唔平，無意中試到呢間車仔麵都唔錯。車仔麵最重要當然係啲餸嘅用料同味道，首先我幾鍾意全部都大大件好足料，當中蠔油冬菇同司華力腸更加係重量級，冬菇有手掌咁大，司華力腸就半條咁上，啖啖肉嘅感覺好爽。 牛孖筋都炆得好腍好入味，有牛腩麵鋪嘅水準。朋友叫左蘿蔔好清甜，豬肚乾淨冇怪味。錦鹵韮菜雲吞新鮮炸起好酥脆，韮菜豬肉餡炸餃真係冇得輸，香口惹味，醬汁酸酸甜甜唔會膩。泰式豬頸肉好大塊，脆口得黎仲保持到肉汁，尤其是小食只係加二三十蚊，性價比真係好高。