謝謝儂 (V City) (已結業)

今日到V City 晚餐，貪方便見謝謝儂唔駛等位，地方闊落，黃金時段只得幾枱食客（同層其他食店都好熱鬧呢），諗住可靜靜地品嚐美食，結論係……事出必有因，難食好頭痕！兩個人叫了5道菜式如下：宮保雞丁~花生佔最少70％，唔香唔辣，多油多醬汁！排骨擔擔麵~排骨乾柴柴，麵煮得過淋無彈性，湯底唔香唔濃完全少少辣味都無，唔知攪乜鬼！黃金四季豆~味道係唯一可以嘅，但質感好唔掂，似係將四季豆用水烚過淋之後，用油炒咸蛋黃撈勻算數，口感太濕太淋，唔夠乾身！椒鹽小黃魚~小小一條黃花魚，炸得唔夠時間所以唔香脆，唔可以連骨食，椒鹽味好輕，魚嘅鮮甜味欠奉，仲有少許腥味！爆汁煎小包~唔覺爆汁，一客4隻，其中一隻內餡完全無汁，肉唔鮮皮唔薄，做得好差！茶水每位5元，但杯所謂嘅茶仲淡過茶記用嚟洗餐具嗰杯茶膽加水！埋單時，女侍應生話多謝＄3xx，我話想睇睇張單，佢就放低後半秒不停留走咗去，我只用咗10秒睇單，之後放下信用咭，侍應生一去無回頭，等呀等，有另兩位侍應生掛住傾計唔理我，我問你哋到底收唔收錢架（當時只得三幾枱食客）？最終等咗成5分鐘先有另一位幫我結帳！正所謂食之無味，棄之可惜，呢間嘢真係謝謝儂喇，絕對無下次！