新泰東南亞餐廳 (太子集團中心) (已結業)

對於上樓嘅餐廳我都有戒心，但見到呢間餐廳嘅樓下都算企理，上到樓睇見裝修都唔錯，人又唔多，即管試下。呢度午餐一律$75唔貴，份量和味道都超乎預期，加上窗口景大卡位，唔俾好評都唔得。香草牛柳絲炒河粉外表睇落材料好簡單，上枱好夠熱，幾大碟頭，食落味道好香而微辣，啲餸嘅份量幾多，牛肉有濃濃金不換嘅味道，泰式粗身河粉好彈牙。馬拉肉骨茶配白飯上枱好夠熱，肉骨茶嘅藥材味適中，餸嘅份量幾多，冬菇厚身有香味，肉係切成粒狀容易入口，成個肉骨茶做得幾好，如果再濃些少更佳。綠豆沙冰係用綠色嘅綠豆加椰汁，然後係碎冰機攪拌出嚟，味道香甜，入口似食冰凍綠豆沙，椰汁味香濃。