金龍泰國菜 (已結業)

呢間野係其他太古人推薦我食，佢位置唔係好起眼，間舖唔係好大嘅，但係星期日晚係完全坐到滿曬嘅！！佢應該係兩個泰國人嚟嘅，自己生意，正宗泰國野！食物嘅選擇都有好多嘅，咖哩呀， 冬陰功呀，炸春捲豬頸肉嗰啲拼盤呀，鳳爪etc.見到隔離枱嗰個海南雞好正，所以我哋都嗌咗。呢度係半隻，但係都好足料，而且係煮到啱啱好熟咁樣嘅，好嫩！雞係非常之肥嘅，但係好食呢個係冬陰功湯麵，我地揀咗粉絲，仲可以揀河粉或者係金邊粉。佢係偏酸味啲，雖然睇上去好多辣椒，但食落唔會好辣。 反而係另外一個泰式炒通菜(唔記得咗影相)就真係有啲辣。食泰國菜一定要食泰式炒金邊粉！佢都係比較濕潤嗰種，味道偏甜，但係我鍾意濃味嘢所以就覺得好好味，但係就冇青檸同埋花生粉畀我哋囉，有埋青檸就perfect! 呢一個係菠蘿炒飯，但係睇落去呢勁似係星洲炒米嘅飯版本。似係有啲咖哩粉咁樣炒，同平時食啲菠蘿炒飯唔係好一樣。呢個就覺得係一般，但係其他食物都覺得好好味。，人哋話呢度豬手好好食，但係因為我哋今日去呢豬手英已賣曬，下次試下先得。