Error19 夢幻烤魚場 (已結業)

雖然轉左Menu做烤魚之後都未食過，但係因為呢間餐廳真心正所以都想寫食評推介下！作為緊貼香港樂壇嘅我，即使唔係Mirror fans，但入到嚟聽歌睇相都會有種青春感同親切感！我首推嘅係呢度嘅環境，真係好適合少女嚟食嘢！無論係粉紅色，佢嘅擺設，還是係整得好靚嘅好多Mirror 嘅相都係一絕！其次個人覺得呢度仲未算好出名，所以都唔多人留意到呢間嘅餐廳。於是就有一個幾重要嘅優點，就係店員因為未算好忙都係好用心去serve每一個嚟嘅客人，睇得出佢哋整嘢食嘅擺設，同甜品都係有花心思同時間喺裏面，即叫即整絕無欺場！雖然menu 轉左，但都講下關於食物！上次去食左幾個小食，有炸魷魚、芝士薯條、沙律同埋兩個甜品，我真心覺得呢度嘅Menu一啲都唔貴，就算叫小食都食得好飽肚好開心！我特別深刻個甜品，佢地既梳乎厘同牛角窩夫真係整得好出色，無論顏色味道口感足料我都比高分！