六合小巷 (已結業)

早前睇IG廣告介紹呢間台灣牛肉麵店，見到好似好多好評，仲要環境好岩打卡咁，所以就bookmark咗呢間餐廳。到今日星期一，放工隨便碌吓Open Rice就誤打誤撞諗咗嚟呢度試吓，覺得被人伏咗。我哋大約7:00pm到，晚飯最旺嘅時間，間餐廳得一對情侶，入面裝修還好，但服務員態度一般，唔算係非常差，但語氣好似唔太好。坐低後見到檯面其實好多塵，間店少少暗，裝修有落心機，但我覺得一間餐廳最緊要係衛生、然後係好食、再嚟就係服務。呢度環境衛生喺我standard嚟講係中下，食物都係中下。麻糬芭樂骨，好似糖醋骨咁，啲白色係麻薯，啲肉比較靱，好難咬，但算叫好食過啲麵。牛三寶麵。牛肚有啲騷味，牛腩還可以，個沙唔熱，麵唔入味，個湯亦冇乜牛味，我知道冇得同台灣嘅比較，但水準之差，令人好失望。黑麻油蟲草花濃雞湯麵，朋友覺得一啲藥膳味或一啲雞湯味都冇，湯亦唔好飲。咁嘅質素仲要加一，呢張單係未找數之前影，埋單時先知要加一，所以係$306.9。