炑八韓烤 (偉華中心) (已結業)

平日到呢間店食嘢，都係快手快腳有得食。今日下午諗住趕時間，去到叫咗個韓牛雪濃湯配飯午餐，點知就中伏。坐低未落單，已送上餐湯， 得啲鹹鹹地嘅水， 算數。跟住上埋啲配菜，味道唔錯。點知食哂所有嘢，個雪濃湯飯仲未到，我揾個女服務員問下，睇吓是否漏單，佢望住我目無表情，聽完走咗去，繼續送佢嘅飲品。之後再等，雪濃湯配飯仲未到，我唯有揾另一個男服務員再問， 點知佢聽完又係木無表情 ，乜都無講就咁去送佢嘅餐 ，睬你都傻，我O咗嘴…………我望吓個錶，已經落咗單35分鐘。再等……無時間喇！終於忍唔住自己走去佢個開放式厨房同入面嘅員工講，我趕時間，個湯飯嚟唔到唔好再嚟喇！好幸運咁 ，個湯飯就喺呢個時候出咗 ，咁我唯有快快趣趣食完， 即埋單走人。呢間食店都算經典，我發覺服務員個個木無表情，你有問題要揾人問吓，個個睇你唔到，其實服務員每人負責範疇不同，本無可厚非，唯漠視顧客查詢，毫無反應及跟進，則管理層實應作檢討及改善。