添好運點心專門店 (已搬遷) 新店位置

小妹食過兩次,好幸運地,每次都係等一個鐘左右就入得啦!第一次豬潤腸粉皮薄好滑,豬潤唔鞋口,好正!潮州蒸粉果我未食過咁好食既潮州粉果,皮比坊間的薄,餡料好香口,可能落左好多韮菜既關係~真係好味~一定要試!!!酥皮叉燒包必食推介!外皮薄脆,酥皮十分之鬆化!叉燒醬香味好濃郁~新鮮熱辣,食時小心辣嘴鮮蝦燒賣皇蝦爽口,豬肉好juicy,但我唔中意燒賣皮好大陣"簡"水味!第二次潮州蒸粉果同第一次食一樣,真係好鬼正!晶瑩鮮蝦餃蝦餃皮好薄,蝦十分之爽口!豬潤腸粉皮又薄又滑!鮮蝦腸粉蝦好彈牙!咸水角推介!好味到我唔識形容~想叫多轉但太飽食唔到了...陳皮牛肉球:牛肉味濃, 唔多粉,幾好!酥皮叉燒包有水準,即焗即食~勁好味!金茹牛肉腐皮卷煎得好脆身但食味就普通呢~腊味蘿白糕蘿蔔絲條條用人手切,好有口感~好軟身,夠味!馬拉糕我覺得好普通~桂花杞子糕好好食我覺得,好香桂花味既同時又唔會得個甜味!以平民價錢可以食到酒店級水準的食物~讚!!!