養心殿台式養生鍋 (已結業)

之前已經食過其他養心殿嘅分店，成日都想過翻尋味。朋友喺將軍澳返工，點知原來將軍澳都有分店，位於酒店裏面，比起其他分店寬躺舒適。今次叫咗麻辣鍋小辣。本身湯裏面已經有豆腐同埋鴨血。如果唔食得太辣，可以預早夾起少少辣椒。墨魚滑都幾大份，要一整舊上，要少少功夫，小心用匙羹將表面嘅飛魚子混合墨魚滑，分成小份，先放入鍋裏。豬肉新鮮唔肥膩，而且夠豬肉味。見到一啲都唔肥膩。麻辣鍋本來已經附送鴨血同埋豆腐， 份量相當多。另外仲可以再免費追加半份鴨血。呢度嘅鴨血絕對係食過最好食嘅鴨血。非常滑，唔腥，亦都好入味。墨魚丸同埋韭菜餃就不過不失啦。另外仲帶咗唐生菜，味帶苦，亦都好快吸收湯裏面嘅辣味。如果唔太食得啦，可以避免叫。兩個人食，埋單$600有找，坐咗三個鐘，性價比算唔錯。