蜂茶台灣料理及甜品 (已結業)

首先要講下本人是第一次寫食評，原因係無可能唔寫！話說有日晚上9點幾，我地一行4人，當中我地有人食佐嘢都飽飽地，而有朋友就未食晚飯，咁諗住揾間又可以坐下，食下甜品，食下晚餐嘅餐廳。於是乎行行下就見到呢度有哂我地想要嘅嘢，又有甜品，又有麵食。跟住我地入到去就叫佐2個麵，2個甜品啦，之後我地食食下就有個人（原來係經理）問我地：呢2個麵有2杯餐飲，要飲咩？ 我果2個朋友都好奇問：咩有餐飲嘅咩？（因為明明記得個餐牌都無話有）咁當時佢問到，咁我地咪叫佐1杯凍冷茶同1杯珍珠奶茶。食到咁上下，個經理就走過黎同我地話埋單先，我地見到張單係點解杯凍冷茶要十幾蚊？杯珍珠奶茶要廿幾蚊？咁好正路我地會問：你頭先唔係話有餐茶咩？就係呢個時候，果位經理突然係我地面前一野掉我地本單簿過隔離枱，仲要講：咁我唔做囉！你想點？係我落錯！咁我唔做囉！咁我唔做囉！咁當時第一反應我地係呆佐，之後我問佐佢一句：咁你想點？（當時其實真係好嬲，但事關我地係4條女，點都會驚佢唔知做啲咩，所以無同佢嘈）然後，條友再話：依家係邊杯嘢飲？唔好飲啦！我同你掉佐佢！講完，佢無掉杯嘢飲，自己走佐返佢個cashier 度一邊係咁掉嘢，一邊改返張單。