💬一行入依間餐廳就有種好FRESH既感覺。田園風格的佈置令人覺得好似晌室外進食咁。我同朋友係中午時間去，相信夜晚去既話會更加CHILL，下次會試試。依度空間算大，唔會有擠迫感覺，適合同朋友相聚。我地叫左兩個SET LUNCH，餐牌選擇都算多，丼飯、烏冬、意粉、意飯、漢堡，同扒樣樣有齊，啱曬唔同口味既人。我同朋友就叫左兩個SET LUNCH share嚟食。
💬每個set lunch會配送精選餐湯/ 沙律，仲有餐飲一杯
🥗前菜沙律
我想讚一讚個沙律，一上枱已經見到佢好大碟，心諗食菜都可以食飽 (講笑)，上面有蕃茄仔同粟米粒，不過冇諗過啲醬會咁多 (因為我個人唔太中意沙律醬)，我下次去會預先叫佢少醬。但抵讚既係啲菜食落口好fresh，唔似出面啲沙律菜食落口就知放左好耐。唯一美中不足可以就係佢係原塊菜咁放，太大塊一放入口就成塊臉都係，要用刀切一切開再食好似就美觀少少哈哈。但整體係滿意既。
⭐評分：4.5/5
🍽香蒜辣椒欖油牛柳意大利麵 HKD 78
依碟意粉既香蒜味好出，辣度唔錯，應該係3小辣既程度，令意粉十分惹味，份量算多，意粉質地比較硬身，鍾意有咬口既人應該會滿意，但可能因為意粉煮得唔算耐而調味足夠，佢煮出黎之後個感覺係意粉吸左味，但又唔會吸左啲油，再加上碟面既青瓜絲中和左意粉既油膩感，所以食落唔會有咩負擔。而牛肉都鮮甜同埋唔少，都算幾抵食。
⭐評分：4/5
🍽烤大啡菇芝士自家製牛肉麥漢堡配香料薯條 HKD 99 (必食+超抵)
超巨型漢堡，一上枱已經「哇」左一聲出黎，擺盤靚爆之餘，味道真係冇得彈。首先係個包烘得恰到好處，外脆內鬆軟，面頭已經一塊大啡菇趴左晌度等人魚肉，一切開啲汁係即時「標」出黎，juicy到一個點。牛肉切開後係見到粉紅色，又香又嫩，正到暈，配搭芝士、洋蔥，一齊放落口既時候簡直幸福感MAX。薯條方面就係即炸薯條，熱辣辣，又粗又大條，好香好好食，整體性價比極高。
⭐評分：5/5
🍽檸檬海鹽甜薯 HKD 19
本身以為係好似OUTBACK咁一大舊甜薯出黎，原來係好似薯條咁形狀既。所以今日都食左幾多薯條。但佢係真係甜薯做，係炸甜薯，都幾好食，甜甜地又唔會漏。但因為我已經有個漢堡薯條，食咁多真係有啲OVER…但如果係叫其他SET 既話都真係可以試試，幾甜別既薯條，炸得好香。但唔知係咪因為太甜，食到後尾，會開始覺得依個味有少少厭，所以建議都係3-4人先食，「少食多滋味」呀！
⭐評分：3.5/5
