熨烤達人 (已結業)

約飯約咗成兩個月，終於約到日大家都得閒🤩，又挑起條癮想韓燒，今次就揀咗熨烤達人，因為我同朋友之前都有食過，唔洗驚中伏嘛🤣一入座店員就即刻送上三款前菜，味道唔錯㗎，而且就咁食又得，用黎包肉食又得，我地都refill咗好幾round！爐邊蛋係我食韓燒既至愛之一，有粟米同芝士比我地落落去，加埋真係勁好味，尤其係落芝士，正🤩上次試咗熨斗烤壓set，食物幾高質又抵食，今次就試下超級熨斗烤壓set，有M5牛肉眼扒、牛肋骨、特級雪花牛、厚切五花肉片同埋調味豬皮，牛同豬都有齊晒，正啊！最中意M5牛肉肉眼扒，送上黎個陣仲未開封，確保係真材實料。之後店員好細心咁幫我地燒，仲問我地要幾成熟，咁既服務認真抵讚。味道認真唔錯，肉質軟腍且牛味頗重。之前唔知喺邊度聽過，韓國人食燒肉興食水冷麵，我地都學下韓國人叫咗碗水冷麵，酸酸甜甜咁好開胃，而麵條就彈牙有咬口，整體而言不過不失。餐廳宜家搞活動，只要like Facebook page就有飲品送，當日有士多啤梨或者藍莓梳打揀，我就揀咗前者。本身諗住送既都唔會好得去邊，點知勁大杯，仲要味道都唔錯！