素食一家 (已結業)

平時無人肯陪我食素，難得今日忙裏偷閑，自己一個人，更係把握機會。入到黎播緊嘅音樂令到我感覺心境平和，同出邊吵鬧環境完全隔絕。好耐未試過咁平靜咁食一餐飯，好舒服。餐廳裏面唔係好多人，坐喺個卡位度就好似自成一角，靜心品嚐美食。店員先送上一壺熱炒黑麥茶， 清清地，消滯解喝。午市餐牌叫咗兩個招牌菜，好快手，上菜速度👍🏻👍🏻。北海道芥末龍蝦球＄78熱辣辣新鮮炸出來，芥茉醬有少少攻鼻嘅感覺，唔會過於濃，食落真係好似龍蝦球，肉質彈牙，完全唔覺得自己食緊齋菜。香煎自家野生竹笙腐皮卷6件＄88雖然林上咗芡汁，但腐皮卷仍保持皮脆，內藏竹生菇菌， 口感不膩。佛手瓜老火湯（原盅）$32用料十足，打開蓋，湯騰騰的，好香嘅粟米紅蘿蔔味道，店員話係自家製健康，絕無味精。薑茶菊花＄38其實就係薑汁豆腐花，但係師傅將豆腐雕琢成一朵菊花，賣相相當唔錯，滿足視覺享受。伴以薑茶享用，辣辣地嘅薑茶保暖驅寒一流，甜度適中，豆腐花非常滑溜，入口即溶。餐牌上寫咗多句好有意義嘅說話，而我最鍾意嘅就係：用這餐飯的時間去更了解和關心與你同台的人，非常讚同，因為現今好多人食飯都揸住個手提電話冇溝通。