Cafe Charm's (已結業)

趁住周年紀念日子，下午休息，我地就試下唔太就腳但口卑不俗既 Cafe Charm's，未到3點黎到，等唔到下午茶時間。於是叫左一份 set lunch 再加一個 waffle，2杯飲品。忌廉蕃茄湯（跟餐） - 有即打既新鮮蕃茄茸，濃濃既味道，少少酸，很開胃。香蒜海鮮意粉 - 意份硬度剛剛好，唔太淋，食落有濃濃既香蒜味，海鮮配料食得出有預先調味過，蝦亦爽口，如果可以多一隻就好喇！士多啤梨窩夫 - 兔女一直都想試呢度高評價既窩夫，上枱時，侍應好鬼馬咁講「請準備尖叫聲同掌聲！」，好識攪氣氛！我地當然亦以掌聲回應啦！窩夫焗得外脆內軟，食落仲有少許餘溫。士多啤梨雪糕𥚃面有士多啤梨肉，配上杏仁碎加埋士多啤梨醬，一啖有多個層次口感，好味！士多啤梨帶微酸，我地反而仲鍾意，可以中和整個窩夫既甜味！飲品叫左凍薄荷朱古力同埋熱榛子鮮奶咖啡。薄荷朱古力既薄荷味好夠，但又掩唔到朱古力味，兩者份量調較得好好。榛子鮮奶咖啡好有榛子味，但一D都唔會太甜，呢杯係兔女飲過最好飲既一杯榛子鮮奶咖啡！