星巴克咖啡 (已結業)

XO仔每日最少飲用三杯咖啡，體內猶如流著咖啡血 ！深知小弟飲食習慣o既H君於去年年尾，送贈咗張「星巴克卡」作聖誕禮物，故小肥不時都會幫襯名咖啡店。「星巴克咖啡」於W Square旁o既分店位於灣仔核心地段，附近勁多旅遊巴停泊，怪不得店內o既客人大多為外籍人士，談話內容中聽到多國語言。為此，咖啡師最基本需懂以廣東話，國語及英語溝通，真係少啲耐性及語言能力都未必應付得黎。眼見三位美少女忙碌地調製啡品，仍能保持笑容面對食客，小肥當然係要加分啦 ！手持星巴克卡o既XO仔現今為綠星會員，亦即生月期間可免費享用手調飲品一杯 。由於揀選特飲都得，所以就叫咗杯新推出o既「夏日馥莓意式奶凍星冰樂Summer Berry Panna Cotta Frappuccino」。夏日馥莓意式奶凍星冰樂杯底奶白色o既係意式奶凍層，用飲筒啜，口感就好似啜緊波霸奶茶入面啲珍珠咁，但就幼細滑溜得多。奶凍面為馥莓醬及忌廉，酸酸甜甜，大熱天時飲用極之清新涼快 ！特飲集甜品及飲品於一身，賣$41杯算係店內抵飲產品。