極尚大瀛喜日本料理 (已結業)

今日朋友請食放題做生日飯，因為唔想太夜食，所以選擇17:30時間，食完仲可以行下街先返屋企。因為book咗枱，所以準時上到去唔洗點等位就入到去喇。一行入去就見到中間位置有好大嘅自助吧，有小食、飲料、甜品等。我同朋友被安排坐窗邊嘅二人枱，位置幾闊落幾舒服。點餐嘅任務交俾朋友，我就行咗出去拎少少小食、沙律同飲品。黑松露炒雜菇幾好味，好香，而薯角都炸得唔錯，香脆可口。朋友話蒜泥白肉都幾好食。坐低後一陣野食就嚟喇，首先係刺身。帶子同榮螺好鮮甜，劍魚腩油脂味好濃，甜蝦亦都好爽口彈牙。炸物類炸得唔錯，我比較喜歡食芝麻雞翼，好香芝麻味同好脆，多春魚同吉列蠔嘅炸皮唔太厚，隻蠔幾肥美。七味粉烤雞翼都唔錯。西京燒比目魚燒得幾好，肉質嫩滑，唔會太鹹。烤羊鞍唔太羶，幾多肉汁，好滿意。焗原隻帶子幾好味，不過多油咗少少。叫多一碟炒椰菜，始終食啲纖維對腸胃好啲。最後食多少少甜品就超滿足喇。