浜焼き (已結業)

差不多到小妹生日，亦即是可以瘋狂食好野之時。呢排不停同朋友提議D想食好耐既餐廳，哈哈！呢間我一直袋係袋，未有機會試，而家就係好時機。刺身盛揀左5款刺身，當中珍寶牡丹蝦令人一試難忘！肉質新鮮，味道鮮甜，入口滑溜，殊一聲就落左肚lu。呑拿魚亦好出色，夠哂厚切，啖啖肉既感覺實在令人滿足。浜燒盛二人前相信呢個係大家黎到必點既。有帆立貝、蠔、蟹肉蟹膏、鮑魚、海老。另外亦都單點左白貝。白貝六十幾蚊三隻，但絕對值得叫。小小一隻都可以燒得出神入化，而且加左清酒豉油去燒，非常入味，夠爽囗但又唔韌。而全晚最最最令我心心眼既係蟹肉蟹膏！！！放係蟹蓋上燒，邊燒邊攪勻，上台已經香氣四溢。再將佢配埋薯片食，個種蟹膏香係個口入面縈繞不散，好正呀！仲有隻海老，手掌咁長，燒完店員仲好好心機起殼，擺靚靚上碟，加哂分。COEDO Beniaka 估唔到呢到仲有日本手工啤，揀左呢款酒精較高，麥味好香較重，配浜燒一流。柚子雪葩食完咁多濃味，黎個柚子雪葩清清味蕾，為呢個完美既晚餐作結。