豫園 (已搬遷) 新店位置

呢晚家人想食上海菜，久聞餐廳係米芝蓮推介餐廳，於是決定過嚟試試先。餐廳裝修充滿中式風情，枱與枱之間有一定距離，傾計用餐都好舒適。前菜 - 少少咸，脆脆哋，作為開胃菜不錯!舟山海蜇頭 - 海蜇頭爽脆，口感很好，唔會好似橡筋咁咬唔開，麻油味香濃，食完一件又一件。南翔小籠包 - 小籠包皮薄多汁，夾埋薑絲點埋鎮江醋同食，不但帶出豬肉鮮味，亦平衡咗小籠包嘅油膩感。龍鬚鮮魚絲 - 呢道菜好考刀功同廚藝，師傅要先將桂花魚起骨切成幼條狀，炒完魚肉都能保持完整，唔會碎晒咁，魚肉食落嫩滑，很鮮味，為是晚最驚豔嘅菜式。樟茶鴨 - 最怕樟茶鴨又乾又柴，呢度燻得剛好，鴨肉保持細嫩，不會乾爭爭，而且唔會過咸，半隻鴨份量都唔少，配上夾餅，可去除油膩感。惹味豬全骨 - 豬肉軟淋又 juicy，掃上類近燒汁嘅醬汁，好香口惹味，送飯一流。肉絲兩面黃 - 肉絲醬汁跟麵分開上嘅做法很讚，我哋可以按需要嘅份量自行加肉絲醬汁，兩面黃食到最後都仲好脆。醬爆雞丁 - 除咗雞丁，加咗馬蹄一齊炒，令整道菜更清爽。這晚大家不但食到美味正宗嘅上海菜，而且店員親切有禮，不時主動加水同換碟，下次會再同家人朋友過嚟 encore!