阿四車仔麵 (已結業)

突然好想食車仔麵，所以上網就搵到呢一間新式車仔麵舖頭，一入到去環境好光猛，而且好乾淨，同一般嘅車仔麵舖頭感覺完全唔同。舖頭座位都算多，一入去店員就安排我哋坐喺梳化位置。車仔麵嘅配料都十分之多，我同朋友分別揀咗一碗淨餸同埋一碗四餸一麵嘅配搭，再嗌多左三個小食同兩杯飲品。兩碗配料分別嗌咗蘿蔔、辣魚蛋、豬大腸、炸魚皮、牛腩、滷水腩肉、冬菇、糖心蛋同瑞士雞翼。我哋覺得最好食嘅係蘿蔔， 十分清甜，喺出邊好難食到。麵食方面，都有十分多嘅選擇，而今次我哋就揀咗米線。醬汁方面，除咗腩汁我仲揀咗沙嗲醬，呢度嘅沙嗲醬十分出色，絕對會因為佢嘅沙嗲醬而返轉頭再食。而三個小食就揀咗炸墨魚卷、炸燒賣同埋辣魷魚。超鍾意佢個炸墨魚卷，一份有四條，啖啖肉而且炸得好香口，值得再食。而辣魷魚同埋炸燒賣份量都好多，以$22一份小食來講，簡直物有所值超抵呀！見到餐單仲有其他飯類食品同埋其他小食都好吸引，我下次一定會返嚟再試試！