餐廳環境幾舒服，坐得唔會太逼，幾適合朋友聚餐。我哋點咗幾款招牌菜。
首先係小食拼盤，有沙爹雞串、豬頸肉、炸墨魚餅同炸雞棗，四款都係泰國地道小食，唔油膩，特別係個墨魚餅，食得出彈牙感。
主菜點了瑪沙文咖喱牛肋條，呢款源自泰國南部嘅咖喱，香料層次好豐富，唔會一味得個辣字，反而係溫和醇厚。牛肋條炆煮火候剛好，肉質軟腍又吸滿醬汁，配埋外脆內軟嘅印度飛餅一齊食，真係一流享受。
另一道蟹肉奄列亦做得相當出色。蛋煎得夠香，外層微脆內裡保持濕潤，最重要係入面嘅蟹肉份量一啲都唔孤寒，啖啖都食到蟹肉嘅鮮甜，唔係淨係得個蛋味。
飲品方面，凍泰式奶茶茶味同奶味平衡得好好，甜度適中。凍班蘭菊花茶就好清爽，食完濃味嘢飲返杯正好解膩。
