Bitcino (已結業)

今日放假約咗朋友去中環飲杯嘢傾下計,朋友帶咗我去一間好有格調餐廳。Bitcino 餐廳酒吧,地址係中環些利街2至4號 LL TOWER 23樓,上到餐廳裝修得好有格調,主題以賭場x比特幣為主,連個杯墊都係比特幣杯墊,電視都係播放緊比特幣嘅價格真係好專業。適量嘅音樂加上坐位空間好足夠,喺度飲嘢感覺到幾放鬆。飲品方面餐廳推介咗兩杯cocktail ,Bitcino 同 Runner Runner 分別都係148蚊,兩杯cocktail味道都係帶有果香,入口酸酸甜甜,味道清新。果味比較重,少飲酒嘅我都覺得好好味。Roast chicken with rice , 賣相真係勁吸引,有青瓜,蕃茄,生菜,紅蘿蔔絲,加上特別嘅沙律醬汁,味道酸酸甜甜特別開胃,雞肉好嫩滑好juicy,剪少少沙律醬一齊食味道都幾有層次。炸雞配沙律醬,炸雞外面炸到金黃色脆卜卜,入邊嘅雞肉仲係好嫩滑,雞皮卜卜脆香口惹味,配上沙律醬增添味道層次。