呼吸冰室 (已結業)

呢度裝修正相信大家都知，所以唔再擺相。但嚟呢度，真係要有心理準備，係剩係食裝修。食物方面，唔止上菜慢，係連收錢都慢。我去到時係星期六晚八點幾，全場都係坐滿一半左右，但去點菜時由於佢哋係用一部細細部接收器畀客人坐返埋位等通知，而啲接收器係返唔切，所以我去到時有兩個人左右要企喺度等到有機返至點得嘢。頭先話上菜其實都唔多啱，因為係自取，食完都係自己攞返個兜出去畀佢收。呢啲我係完全冇問題嘅，美國大部份快餐店都係咁。我點咗一個parma ham salad, 一件朱古力牛奶多士，一杯latte，一杯蜜桃綠茶。個沙律份量唔多，但味道還可以，因為菜新鮮，但件多士就真係完全唔合格，一切落去經已係韌到切唔開，食落去唔好話脆，直頭食緊膠咁，應該係因為麵包唔新鮮。我心目中，整件多士係好基本嘢，呢度做唔到。latte當然唔會及真正cafe出品，味道似mccafe嗰啲。員工大部份對客時都好有禮貌，會提仲有幾耐收舖，有需要幫忙時亦好快手。加上裝修實在係有特色，如果食物質素能改善，呢度絕對會係我常到食店。