伊甸 (已結業)

觀塘工業區有唔少質素唔錯嘅台灣食店，以前嘅小伊甸係其中一間，可惜後來突然關門，以為執咗，原來已經重開返，變咗叫伊甸，咁就當然要再嚟幫襯。我見大部份食客都叫 Eden 特盛台式雙餸套餐，無他，$89 有前菜有飯有餸有甜品有嘢飲仲唔使加一，又真係好抵食。我同對面位一人叫一份，都係揀秘製辣肉碎，我食乾拌新竹米粉佢食珍珠白飯。秘製辣肉碎麻辣味重，非常惹味，餸幼身嘅新竹米粉食一流。四個餸我哋揀咗鹽酥雞排，鹽酥豬排，走糟雞中翼同台灣腸，呢個就冇咩太大驚喜，都係正常水準，想講下個酒糟雞中翼，肉質嫩滑，不過略嫌酒味唔夠，濃返少少就更好。同舊店一樣，重點喺飲品度：賞茶出品，信心保證，我叫嘅波霸奶茶茶香奶滑珍珠入味 Q 彈，高質👍。最後嘅甜品紅豆仙草芋圓又有驚喜，跟餐冇諗過咁大碗😯，食完，非常滿足。