辣吧 (已結業)

平時好少會行過諾士佛臺呢邊，今次同媽咪行開商場，夜晚就順便係附近食下野。今次揀左呢間辣吧，係食中式海鮮鍋，岩曬媽咪胃口。上到一樓，覺得佢既裝修令人眼前一亮，好有格調同氣氛，係好中式既設計，掛左好多紅燈籠同紅色橫樑牌匾，好似穿越左返古代咁，再配埋現代歌曲，感覺相當奇妙。佢既濕紙巾同紙巾盒好盞鬼，玩味十足。我地兩個要左6款既海鮮大咖，一上黎就用個大鐵盤裝住，下面會用個火芯一直暖住，不過就要等少少時間先可以等到d食物滾。因為我地都有d肚餓，如果可以加多個芯快d熱就更好啦。講返d食物，都幾足料，個店員話日日都唔同，今日有蟹、扇貝、鮑魚、魷魚、海蝦同花甲。花甲同扇貝大大隻，而海蝦就好貼心咁剝左殻，剩返個蝦頭，方便我呢種懶人。除左海鮮，仲可以揀4款配菜，我特登要白蘿白同冬瓜，可以索d醬汁，最尾既時候淋曬好入味。