學利魚蛋 (已結業)

近年裝修過，比以前變得光猛、寬倘、乾淨、高檔左，坐得舒服 ~ 麵檔服務間間差不多啦，倘算滿意 ~ 依間算係新派麵檔，並唔係只得潮洲粉麵，仲有啲快餐小食、小炒、即食麵、烏冬、日式小食、什菌、金菇、等等 ~因為我由細到大一向都係大埔新蔡、舊蔡同洪記魚蛋既 fans，見學利以魚蛋為招來，所以一直都無黎幫襯。近來發現佢既五香牛腩同煮麵既手藝非常出色，所以到依家每次都只係獨孤一味五香牛腩 ~五香牛腩撈粗麵走蔥，好濃郁好香既五香粉，醃得非常入味，真係超超超入味。雖然大部份用上牛腩瘦肉，但無渣有趙口、啖啖肉而且口感非常軟滑。牛筋同樣超入味，炆既時間非常足，絕無欺場，炆到膠口、嚥靭又滑溜，正正正。粗麵麵質非常爽口彈牙，又乾身，完全無水份係碟上面，時間同火路掌握得好好，唔會過腍或水汪汪或一舊舊或一餅餅。濃郁腩汁撈麵已經好好味，無須再加蠔油調味。本人嗜辣，依度啲辣椒油都幾辣，但不會留係口腔好耐，一陣刺激感好快減退，好沉厚既辣味但未夠香，偏甜，不過已令我額頭冒汗。依度清配為鮮魚濃湯，好味。蠔油菜芯，好新鮮好新鮮，嫰口無渣又鮮甜，烚到剛好，唔會過腍或過生，熟透又唔會黃，好 ~